Zai yi wuya gwamnatin tarayya da na jihohi su iya biyan albashi daga watan Yuni — Obaseki

KDK Hausa

Gwamnan jihar Edo, Godwin Obaseki, ya yi ikirarin cewa zai yi wahala gwamnatin tarayya da na jihohi su iya biyan albashin ma’aikatan gwamnati daga watan Yuni ba tare da an buga makudan kudade ba ko kuma cire tallafin man fetur.

Obaseki, wanda ya bayyana hakan a Benin a yayin bikin ranar Ma’aikata, ya ce duk wani hukuncin da aka yanke zai kara kawo wa jama’a wahala.

Ya ce: “Tattalin arzikinmu yana cikin wani mummunan hali, zai zama abin al’ajabi ga gwamnatin tarayya da gwamnatocin jihohi su biya albashi bayan watan Yuni na wannan shekara ba tare da buga makudan kudade ko cire tallafin man fetur ba.

“Bari in yi nuni da kuma haskaka cewa duk da cewa muna ci gaba da gwagwarmaya a Edo, muna aiki tukuru don kyautata rayuwar ku, ba mu manta da cewa Najeriya na cikin matsala ba.

“Dole ne mu tabbatar da cewa nauyi da radadin wadannan matakan, wadanda dole ne a dauka, ba ma’aikata ne kadai ke shan wahalar su ba.

“Yanzu dole ne ma’aikata su tashi su tabbatar sun yi nasara a duk wata tattaunawa kan cire tallafin. Dole ne ku canza daga al’adar mayar da martani lokacin da aka tsara waɗannan manufofin amma ku dage cewa ku ɗauki alhakin ku kuma a tabbatar da cikakken bayyani da aiwatarwa ba tare da Almundahana ba.

“Idan ana yin gyara, to fa’ida da radadin da za a samu daga gyare-gyaren dole ne ya sahfi dukkan ƴan ƙasa ba kawai talakawa ba,.”